Tum Ne Hi Majboor Kiya Hai
Mujh Ko Raah Badalney Par
Jeewan K Be'Ant Safar Mein
Ghair Ka Ho Kar Chalney Par
Main Ne Tumhari Aashaaon ka
Har Har Roop Saraaha Tha
Main Ne Apna Aap Bhula Kar
Tum Ko Toot Ke Chaha Tha
Um'r Ki Ujli Deewaron Par
Qismat Ka Andhyaara Tha
Aur Bohat They Sooraj Lekin
Tum Sa Charaagh Hi Pyaara Tha
Laikin Tum Hi Merey Maseeha
Nafrat K Saanchey Mein Dhal Kar
Ik Din Merey Saamney Aa Gaye
Qaatil Ka Behroop Badal Kar
Ab kya Shikwa, Kaisi Shikaayet
Chaahat K Sab Rishtey Kachey
Main Bhi Aur Tum Bhi Harjaaii
Main bhi Theek Aur Tum Bhi Sachey
Aitebaar Sajid
