vo nau-khez nuura, vo ek bint-e-maryam
vo makhmuur aaNkheN vo gesuu-e-purkham
vo ek nars thii chaaragar jisko kahiye
madaava-e-dard-e-jigar jisko kahiye
javaanii se tiflii gale mil rahii thii
havaa chal rahii thii kalii khil rahii thii
vo pur-raur tevar, vo shadaab chehra
mataa-e-javaani pe fitrat ka pehraa
safed shaffaaf kapDe pahan kar
mere paas aatii thii ek huur ban kar
davaa apne haathoN se mujhko pilaati
'ab achchhe ho', har roz muzhda sunaati
nahiiN jaanti hai meraa naam tak vo
magar bhej deti hai paigaam tak vo
ye paigaam aate hii rahte haiN aksar
ki kis roz aaoge biimar hokar
