aarzoo-e-wafaa kare koii
ji na chaahe tau kya kare koii
gar maraz ho dawaa kare koii
marne_waale ka kya kare koii
koste haiN jale huwe kya kya
apne Haq meiN du'a kare koii
unse sab apni apni kehte haiN
mera matlab adaa kare koii
chaah se aap ko tau nafrat hai
mujh ko chaahe Khuda kare koii
yeh mili daad ranj-e-furqat ki
aur dil ka kaha kare koii
tum saraapaa ho soorat-e-tasveer
tum se phir baat kya kare koii
kehte haiN hum nahiN Khuda-e-kareem
kyoN hamaari Khataa kare koii
muNh lagaate hi ''DaaGh'' itraaya
lutf hai phir jafaa kare koii
